Sunt dre a legg un liber ch’el parla del Domm. 
Semm in del milaetresent, o giò de lì. I Visconti cumandaven a Milan e gaveven in man el balin, e ghe vegnù in ment de fa una gesa, bela e granda, de fa crepà d’invidia tuti i alter.
Quand vun el gà tut, se ga de vegnig in ment? de fa i robb in grand. Però el faseven anca per Milan e per i so amis, ch’eren tucc gran pretuni e cardinai.
De danè ghe ne vureva tanti, e l’è ‘ndada a finì che ghe vursù sescent’ann per finil, inn pasà i Sforza, el Cardinal Borromeo, Napuleun, e anca el Musolini. Hann giustà anca i Navili, per rivà lì cunt i barcuni che scaregaven tutt quel che ghe vureva per i magutt. 
Finalment han finì la faciada, han butà giò un bel pù de cà e hann tirà fuora una piazza, come se dev. 
Minga finida, ghe macaven i purtuni che duveven vess fa cun i stori giust de la Gesa, e de brunz. 
E poeu, nanca el temp de di “be”, che riven i bumbardament!
La Fabrica del Domm la giustà su tutt, e l’è chi che el fa invidia, e tucc vegnen a vedell. 
Ghe semper la cua per andà denter, e la pula de guardia. Denter te par de vess in d’un busch, cun tuti i pilaster grand e gross, e poù i veder tutt culurà, saria come legg la Bibbia con tuti i figur. E su in cima la madunina d’or, cun la bandera, e sota de lè domilatresent statue, che par la turta cun tuti i candelin, e poeù ghirigori, scal e scalett, parapett, e tutt de marmo. L’è inutil però che vu adre a cuntav sù cume l’è faa… cume lè bell… pussè d’inscì sunt minga bunn… 
Lè mei guardà i futugrafii che ghè sui cartulin. Hoo legiù in sul liber, che a ghè, fina, un ciod de la crùs.
N’han parlà ben tuti i sapientuni, in del liber ghe n’è una sfilza, cunt di nomm dificill: Byron, Cecov, Ibsen, Mark Twai e via… Me vergogni un un poù a dill….. , a mi el me pias minga tant….mi preferisi i robb moderni. 
Huei, disi, i gust, in gust….. !

Te vòret mett el punt de Venezia? Quel lì la fà un archistar, in quater e quattrott la metù lì un punt che te ve su, e per vegnì giò te ghe de fà la scarlighèta, ne parla tutt’el mund !
E a Roma? Han fa su la ”Nuvola di Fuskas”, (magari stravachen la ruera in di strad), ma intant, huei….che meraviglia! Adess vòren fa el stadio per giugà al balun, perchè fin’adess giugaven in del campett de l’uratori.
Ma ancà lì avarann ciamà un archistella. Hann pena cumincià, che in andà giamò al fresc, a Regina Cieli, una desena de gentilomm.
E pensà, che el Domm l’han cumincià a fal sù senza progett, in andà avant un pù a oc, e un pù a nas ….!
Ma l’è lì de vedè…….